I Lamenti Del Venerdì Santo Di Mirabella Imbaccari

"Veni, veni Giuvanni o miu fidatu! Portami nova di lu duci figghiu". "Mamma lu vistu allu munti Carvaru, stisu supra lu lignu di la Cruci". O Santa Cruci ti vegnu a vidiri, tutta di sangu ti vegnu a truvari. Cu fú ddu omu ca vinni a muriri? Fu Gesú Cristu ch'eppi 'na lanciata. Figghiu nascisti sanu comu un gigghiu, ora ti viru tuttu spraggilatu. L'angiulu Gabrielu fu conformu: lu calici alla cruci ci purtai.

Va iti ni lu mastru firrareddu a fari fari un paruzzu di chiova, nun tantu rossi e nun tantu pungenti, ch'ana pirciari carnuzzi divini". Poi lu senti lu chiu tradituri: "Quantu chiú rossi li putiti fari, quantu chiú rossi li putiti fari, ch'ana pirciari carnazzi di cani". La Bedda Matri senti su parrari; ieta lu mantu e la terra tremau. Chiamamulu stu beddu Sacramentu! Viva lu Beddu nomu di Maria!

Lu iovi santu e lu iovi mattinu, la Bedda Matri si misi 'incamminu. ppi strata scuntrau a San Giuvanni ci dissi: "Mamma una stati iennu?" "Vaiu circannu allu me Santu figghiu, lu cercu e nu lu sacciu nova" Va iti ni li casi di Pilatu; dda lu truvati strittu 'incatinatu. Tupp tupp! "Cu è d'arrè sa porta? Forsi è me Mamuzza dulurata. Mamma, mamuzza na vi possu apriri; sugnu 'ncatinatu di mani e di peri".

Cristu trentatri anni iu ppi spersu; na neppi quantu unuri di cunostu e di muriri lu sappia di certu quannu faciva orazione al'ortu. Cu ci chiantau li chiova fu gran tortu nessun che na neppi pietà Maria va circannu a lu Signuri e ppi li strati non lu pò truvari sempri dicennu: fighiu o Salvaturi, sula senza di tia non pozzu stari.

Di luni si cumencianu li chianti e va finiri tutta la simana. Di marte costa lu passiu Santu. Di mercuri è la santa Quarantana. Di iovi fu traditu Cristu Santu. Di veneri è di lignu la campana. Di sabatu Maria sparma lu mante Duminica Gesuzzu 'ncielu torna.